اسئلة الانترفيو - الجزء التالت
• What are your strengths
• Tell me 3 strength points in you
- فيه ناس كتير هتقدم بخبراتها لنفس الوظيفة فلو انت اول مرة تشتغل أو ملكش خبرة سابقة فالسؤال ده سلاحك السري للتقدم عليهم بإنك تسيب انطباع للي بيسألك عن قد إيه انت موهبة لسه مش مكتشفه و انك كرستيانو رونالدو الماركتنج و ابو تريكة الحسابات و انه بيعين ستيف جوبز المستقبل!
- فكر في الحاجات اللي بتعرف تعملها كويس و خليها ترتبط بالوظيفة و دايماً احكي قصة تثبت تفوقك فيها و الفوائد اللي هتعود على الشركة من الصفة او المهارة دي.
- مرة قلت في انترفيو اني هفيد الشركة بإني بعرف اطبخ! الـ HR بصلي و استغرب. قلتله اني سكنت لوحدي بعيد عن أهلي و مكنش معايا فلوس كتير علشان اشتري أكل من برا فبدأت ادخل على النت و اتعلم الطبخ لحد ما بقيت طباخ ماهر وصحابي بقوا يجولي مخصوص علشان أكلي. قلتله اني شخص بيعرف يرتجل وقت الأزمات و بيحب يتعلم وبيحب اللي بيعمله و انه هيتأكد من ده كويس لما ادوقه طبخي بعد ما اتعين. :D
- في البداية لفتّ انتباهه، و بعدين خليت حاجة ربما ملهاش علاقة بالشغل تبقى أكبر دليل على اني مناسب جداً و حكيتله قصة قربتني منه و مش هتخليه يناسي ابدا.
- فيه تفاصيل كتير أوي في حياتك ممكن تستغلها زي انك بتعرف تشتغل تحت الضغط بدليل انك تعبت و حصلتلك ظروف أيام امتحانات الثانوية ومع ذلك جبت تقدير عالي. او والدك لما توفى وانت توليت مسؤليات البيت من بعده و قدرت تنجح و تعدي من الصعوبات. ممكن تحكي عن صداقاتك الاجنبية بسبب انك بتعرف تتكلم أكتر من لغة كويس و انك هتفيد الشركة بالتعامل مع العملاء الاجانب.
- التفاصيل و القصص اللي ممكن تستغلها كتير، بس أهم حاجة متنساش انها لازم تكون متعلقة بالـ Job Description و الوظيفة اللي انت مقدم عليها.
تعليقات
إرسال تعليق